九州 鐵道行(1) – 福岡屋台 • 與庶民同味

日本九州文化遺產 天神屋台

日本九州福岡的屋台，一架架木頭車在每天入夜後在街上化作一個個庶民食堂，售賣各類日本的本土食品，是福岡極具日本本土特色的一大標記。由於現在日本政府已經不再發新牌，舊牌又不能轉讓，很快屋台便會變成歷史了，要吃就要趁快lur 。

福岡的屋台主要集中在天神、中洲川端和長濱三個區域。

天神的屋台散落在大廈和百貨公司林立的渡邊通及昭和通之間，攤販選擇最多，其中最人氣的屋台“小金ちゃん”和“長浜屋台やまちゃん”都係位於天神區。

日圓終於回到2006年我去沖繩時侯的滙價了，加埋HK Express開了直航九州的航線，聖誕飛福岡都只係四千幾，唔去日本直係對唔住自己呀。

今次係我這大鄉里第一次飛福岡，我帶小太熊在九州逆時針環繞一周玩足9日，九州九天遊九地包括福岡、鹿兒島、櫻島、指宿、霧島、宮崎、高千穂、黑川溫泉和由布院，好食好住又好玩啊！連小太熊都覺得滿意。

Day 1

中午乘HK Express往福岡，晚上連吃4餐，包括壽司、日本生蠔和到2間屋台食宵夜。晚上住“ホテル日航福岡”。

Day 2

早上到 原田駅附近的 士多啤梨園“筑紫野いちご農園”食放題做早餐，再往 今宿駅附近的“唐泊恵比須かき小屋”食炭燒生蠔午餐，然後乖JR往鹿兒島市。晚上吃“うなぎの末よし備長炭燒鰻魚”和“焼肉多聞”燒鹿兒島牛。

晚上住鹿兒島市“Hotel Dormy Inn 霧桜の湯 ドーミーイン鹿児島” 。

Day3

晨早乘車往開聞駅，用6hr來回行上開聞岳山頂，再到唐船峽流水涼麵“そうめん流し”食流水麵，黃昏到“Healthy Land露天風呂ヘルシーランド”浸溫泉睇日落。晚上回指宿駅 食鹿兒島豬肉。

晚飯後回鹿兒島市酒店“霧桜の湯 ドーミーイン”，浸完溫泉瞓覺。

Day 4

晨早乘車往 出水，登上九州移動餐廳“Orange號火車”食早餐及沿途遊覧至 川內，跟著往櫻島踩單車。

下午乘特色火車“指宿の玉手箱號”往指宿，入住溫泉旅館“花の温泉ホテル 吟松”，在旅館晚飯。

Day 5

在旅館早餐後乘火車往霧島神宮駅，轉巴士往丸尾，行上霧島火山上的 大浪池。

落山後入住 霧島溫泉旅館“旅行人山莊”，在旅館晚飯。

Day 6

旅館早餐後乘車往宮崎，食“大淀河畔みやちく”宮崎牛鐡板燒午餐。

午餐後乘車往高千穂，入住旅館“離れの宿神隠”。在旅館晚飯後，到高千穗神社睇 神樂表演。

Day 7

旅館早餐後遊高千穗峽，中午食炭火燒高千穂牛，然後乘的士往 黑川溫泉，入住溫泉旅館“お宿 野の花”。

黃昏遊黑川溫泉，在旅館晚飯。

Day 8

旅館早餐後往由布院，行街至16:00，入住溫泉旅館“山のホテル 夢想園”。在旅館晚飯。

Day 9

早上在旅館嘆到check out，乘特快列車“由布院之森”回福岡，乘18:00機回香港。

九州 鐵道行 – Day 1

早上出發時一片藍天，希望去到日本天天都係咁好天啦。

從屋企打的去到機場，又係响Plaza Premium Lounge食免費午餐囉!

今日Plaza Premium Lounge的人唔算最多，只坐滿7成，但係竟然要人流管制在門口被截停，等了10min才能入場。

招牌魚蛋粉，味道OK啦，吃了兩碗當早餐和午餐。

飲足水才上機，因為陣間坐的HK Express連水都要錢架。

坐過幾次 HK Express的機都非常準時，今次亦不例外，航機準時13:05從香港起飛。

快降落福岡時，雲層勁厚，天氣麻麻喎～

<<福岡市>>

飛機準時17:00到達福岡機場。從機場要坐15min免費接駁巴士到地鐵站，再乘三個站便到市中心博多駅。

地鐵單程票每位都要¥260，買這張全日票就¥520。

到達博多駅後，第一件事先到JR站買張九州JR 5-days Pass，再Book晒未來日子的指定席車位。

九州JR 5-days Pass(¥17490) – 在火車站閘口向職員show show便可自由出入所有JR火車站，自由乘搭JR自由席，如要乘指定席就要Book定位。

買完Pass後立即Book埋未來幾日所有指定席的車票，唔駛加錢，即時出埋票。

攪掂晒啲嘢，便揹著我自己加埋小太熊的大行李行去酒店。

博多駅外面有聖誕燈飾好靚呀。

仲有好多攤位，有嘢食又有嘢賣。

從車站行5min便到今晚的酒店“ホテル日航福岡”。

大堂只係一般大酒店格局，但臨近假期，房價貴到儍。

因為今日房價Double了，小太熊儍瓜瓜睇錯價錢Book了間單人房，攪到我今晚要屈蛇，Check-in時要呢埋添，好彩間房都係一般雙人房Size，冇細到。

單人房連單人早餐¥18700(平日雙人價都唔超過¥10000)。

Check-in時酒店送了張價值¥1000的Coupon ，可以在博多駅外的這檔攤位換一杯暖紅酒。

䁔紅酒連聖誕紀念杯一隻(¥1000)， 因為現場只有5℃，飲呢杯䁔酒嘅感覺十分䁔笠笠，可是味道真係怪怪的。

飲完酒行10min到附近一條靜ing ing 的後巷，因為小太熊今日Target了一間福岡Number One的隱世壽司店“鮨安吉”就是位於這條後巷，間舖冇招牌，只有門囗勁細隻門牌寫住個名，攪到經過都miss咗，要入附近酒店問人至識行返轉頭，咁隱世，肯定係正嘢啦。

隱世壽司店 鮨安吉

好辛苦找到間舖了，㸃知一推門...原來得6個位仲坐滿了人，而且店長話今晚Full 了。Oh!冇Book位冇得嘆了。

唯有返博多駅樓上食啦，㸃知食店都係排長龍，等了20min才有位。

第 1餐到9/F的“鮨割烹やま中”食壽司。

店內真係坐滿人的，大多數人都係食店長推介的¥5400壽司Set。

我就㸃了¥10800的Omakase和清酒，共有10道菜，但唔包酒水。

凍Sake 180ml (¥756)

小食(1) 三文魚子伴三文魚醋物 – 普通。

小食(2) 蟹肉牛油果沙律 – 唔錯。

小食(3) 炸魚肉凍食 – 普通。

頭盤 海膽三文魚子飯 – 好味。

刺身拚盆 – 只有托羅最正，但亦只係香港都吃得到的靚貨式，比不上築地的貨，其餘刺身只係一般。

主食(1) 海膽蒸蛋 – 非常靚正，海膽和蛋都好香囗，好好食。

主食(2) 喜知次西京燒 – 魚肉鮮嫩香甜，廚功一流，係件頂級靚魚。

熟 壽司拚盆 – 味道一般好。

麵豉魚湯 – 唔太咸，好飲。

果物 士多啤梨 – 又香又甜又好味。

小太熊㸃了¥5400的11件壽司餐，個餐有5件魚生壽司，另外包埋上面的 熟壽司、海膽魚生飯、麵豉魚湯和小食(1)。

魚生壽司5件，只有托羅係正嘢。

整體上呢餐飯唔算好滿意，但冇問題，因為小太熊安排了今晚食4餐晚飯。

第 2餐要上一層到10/F的Hakata Station Oyster Bar食日本生蠔。

日本生蠔專門店Hakata Station Oyster Bar

門口放了不同品種的生蠔，最多係兵庫縣產的貨。

店內仍然滿座的，好彩剛有張2人枱剩，唔駛等。

我要了杯香檳(¥1080)，小太熊叫了烏龍茶(¥500)。

生蠔拚盆10隻共5款(¥5250) – 除了最前2隻係美國蠔，後面8隻都係產自日本兵庫縣4個不同蠔場的生蠔。

兵庫縣的生蠔肉質爽囗，蠔味夠濃，比法國蠔好食。2隻美國蠔最鮮甜，蠔味道亦最濃，所以散㸃的價錢比兵庫縣蠔貴20%。

食完第二餐已經好飽了，但今晚的重㸃未到啊。跟著會坐地鐵去 天神站，幫襯九州屋台食宵夜。

一出天神站行3min便見到十幾檔 屋台了，主打賣天婦羅、關東煮、串燒和燒餅等日式小食，通街擺賣勁有日本Feel呀。

每檔都係得8個位左右，坐得非常逼，十分地道，比香港的廟街食店更好Feel。

首先尋找“長浜屋台やまちゃん”，去到先知原來佢唔係真正屋台，只是間地舖，有10個人等緊位。

長浜屋台やまちゃん係博多豬骨拉麵的發源地，所以㸃飽都要隊一碗。

等足20min終於有位了，入面真係坐無虛席。

元祖 博多豬骨拉麵(¥600) – 义燒及湯底的肉味均香濃，麵質有咬口，係碗頂級的拉麵，但始於比不上和歌山市的 井出商店。

食完碗麵已經到頂了，但還有福岡的 屋台老祖宗“小金ちゃん”未食啊，一定要頂落去。

回到 小金ちゃん已經23:15了，其餘的屋台已經冇乜客，但是小金外面仍然排了9個人等位。

在5℃低溫下等足35min，終於有位了。

屋台內坐足11個人，迫得要宿埋個身至食到嘢。

面前係大盆關東煮，百幾円一件，但我太飽食唔落了。

我和小太熊每人要了杯 鳥龍茶(¥250)，消消滯。

老細忽然送上一碟 小金招牌小吃 元袓炒拉麵，老闆請客，呢碟免費，自己order要¥700。

元袓炒拉麵 – 用醬油加豬骨湯來炒，帶㸃糊狀賣相麻麻，但味道人口濃濃散不開，極有本土特色。 

煎餃子(¥380) – 像超市貨式，唔掂。

明太子蛋卷(¥680) – 係小金ちゃん另一招牌小吃，用蛋包卷着明太子，我一口吃掉一件，第一個感覺係…..好卵味呀.....真係好重卵味，咸咸腥腥帶中辣，配上蛋香，幾特別架。

食完已經24:10了，跑返落地鐡站剛剛趕到尾班車返酒店。瞓得覺都01:30了，明天06:30又要起身趕路了。

補充資料 :

1.)     滙豐換現金價HK$6.62兌¥100。

2.)      簽AE Card後銀行HK$6.58兌¥100，最抵。

3.)     HK Express香港到福岡來回機票(包寄行李20kg)每位HK$4601。

4.)     九州JR 5天火車證 ¥17490，可連續5天任坐九州JR，包括指定席和特色火車，但不包括福岡地鐵。

5.)     從福岡機場乘15min地鐵便到市中心博多駅，單程票價¥260。

6.)     福岡地鐵一日票¥520，可一天內無限次乘坐地鐵。

---待續---